പൃഥ്വിരാജ് ഔട്ട്, പ്രേംപാറ്റയ്ക്ക് പിന്നാലെ വിപിൻ ദാസ് ചിത്രം സന്തോഷ് ട്രോഫിയിലും ജോമോൻ ജ്യോതിർ

പൃഥ്വിരാജിനെ നായകനാക്കി വിപിൻദാസ് സംവിധാനം ചെയ്യുന്ന സന്തോഷ് ട്രോഫികായുള്ള കാത്തിരിപ്പിലായിരുന്നു ആരാധകർ. എന്നാൽ ചിത്രത്തിൽ നിന്ന് പൃഥ്വിരാജ് പിന്മാറിയെന്ന റിപ്പോട്ടുകളാണ് എത്തുന്നത്. പൃഥ്വിരാജിന് പകരം സിനിമയിലേക്ക് ജോമോൻ ജ്യോതിർ എത്തുമെന്നും റിപ്പോർട്ടുകൾ ഉണ്ട്. വാഴ സിനിമയ്ക്ക് ശേഷം ജോമോനും വിപിനും ഒന്നിക്കുന്ന ചിത്രമാകും സന്തോഷ് ട്രോഫി. ഡേറ്റ് പ്രശ്നം മൂലമാണ് പൃഥ്വിരാജ് ഈ സിനിമയിൽ നിന്ന് പിന്മാറിയതെന്നാണ് റിപ്പോർട്ടുകൾ. ഉടൻ തന്നെ ഇക്കാര്യം ഔദ്യോഗികമായി അറിയിക്കുമെന്നും റിപ്പോർട്ടുകൾ ഉണ്ട്.

പ്രേംപാറ്റയ്ക്ക് പിന്നാലെയാണ് ജോമോൻ ജ്യോതിർ സന്തോഷ് ട്രോഫിയുടെയും ഭാഗമാകുന്നത്. ലിജീഷ് കുമാർ തിരക്കഥ ഒരുക്കുന്ന ചിത്രത്തിൽ ജോമോൻ ജ്യോതിറാണ് നായകൻ. സിനിമയ്ക്ക് വേണ്ടി ജോമോൻ ശരീര ഭാരം കുറച്ചതെല്ലാം ശ്രദ്ധ നേടിയിരുന്നു. വ്യത്യസ്തമായ ലുക്കിലാണ് ജോമോൻ ചിത്രത്തിൽ എത്തുന്നത്. പ്രേംപാറ്റയ്ക്ക് വേണ്ടി മൂന്ന് മാസം കൊണ്ട് 20 കിലോ വരെ ജോമോൻ ശരീര ഭാരം കുറച്ചിരുന്നു.

ആമിര്‍ പള്ളിക്കല്‍ സംവിധാനം ചെയ്യുന്ന പ്രേംപാറ്റ ഒരു എന്‍.എസ്.എസ് ക്യാമ്പിന്റെ പശ്ചാത്തലത്തില്‍ കഥ പറയുന്ന പൂര്‍ണ യൂത്ത് റൊമാന്റിക് എന്റര്‍ടെയ്നറാണ്. പുതുതലമുറയുടെ സൗഹൃദം, പ്രണയം, ആഘോഷങ്ങള്‍ എന്നിവ നിറഞ്ഞ ഒരു ക്യാംപസ് ലൈഫ് അനുഭവം സിനിമ നല്‍കുമെന്ന സൂചനയാണ് പോസ്റ്ററില്‍ നിന്ന് ലഭിക്കുന്നത്. ചിത്രത്തിന് തിരക്കഥ ഒരുക്കുന്നത് ലിജീഷ് കുമാറാണ്.

മലയാള സിനിമയിലെ ശ്രദ്ധേയ താരങ്ങള്‍ക്കൊപ്പം സോഷ്യല്‍ മീഡിയ ഇന്‍ഫ്ലുവന്‍സര്‍മാരും സിനിമയുടെ ഭാഗമാകുന്നതാണ് മറ്റൊരു പ്രത്യേകത. സൈജു കുറുപ്പ്, അനുശ്രീ, സിദ്ദിഖ്, രാജേഷ് മാധവന്‍, സഞ്ജു ശിവറാം എന്നിവര്‍ക്കൊപ്പം ജുനൈസ് വി.പി, സാഫ് ബോയ്, നയന എല്‍സ, ടിസ് തോമസ്, ഇന്നസെന്റ്, അശ്വിന്‍ വിജയന്‍ തുടങ്ങിയ സോഷ്യല്‍ മീഡിയ താരങ്ങളും പ്രധാന കഥാപാത്രങ്ങളെ അവതരിപ്പിക്കുന്നു. സിനിമയും ഡിജിറ്റല്‍ കണ്ടന്റ് ലോകവും തമ്മിലുള്ള പുതിയ കൂട്ടായ്മയായാണ് ഇതിനെ സിനിമാപ്രേമികള്‍ വിലയിരുത്തുന്നത്.

Content Highlights: Reports suggest that Prithviraj Sukumaran may no longer be part of director Vipin Das’ upcoming Malayalam film Santosh Trophy, with actor Jomon Jyotir reportedly being considered for the lead role instead.